Di daxuyaniyeke nû de ku armanc jê handana penaberan e ji bo derketina ji welat, Wezîrê Navxweyî yê Awistiryayê Gerhard Karner îro di konferansekî rojnamevaniyê de ragehand ku bernameyeke dravî ya demkî di navbera mehên Tîrmeh û Îlonê de dest pê dike, da ku penaberên Sûrî teşwîqî vegera dilxwazî ya ber bi welatê wan bibe.
Karner tekez kir ku Awistirya vegera dilxwazî ji ber gelek sedeman tercîh dike, ku ya herî girîng kêmkirina lêçûnên aborî ye li gorî dersîrkirina bi darê zorê. Wezîr da zanîn ku ji dema guhertina desthilatê û ketina rejîmê li Şamê berî nêzîkî salek û nîvê, nêzîkî 3000 Sûrî ji Awistiryayê derketine, ku hinek ji wan bi dilxwazî û hinek jî bi darê zorê bûne.
Agahiyên li ser xelatên dravî yên nû:
Wezîr rûnakî xiste ser hûrgiliyên bernameyê û diyar kir ku ew sûdmendan dabeşî du beşan dike. Beşa yekem ku biryara wê 3000 Euro ye, ji bo kesên ku hîn di pêvajoya daxwaza penaberiyê de ne, an alîkariya bingehîn werdigirin, an jî xwediyê mafê parastina duyemîn in. Beşa duyemîn jî ku gihştiye 1500 Euro, ji bo kesên ku mafê penaberiyê yê tam wergirtine tê dayîn, piştî ku ev biryar ji 1000 Euro ya berê hat bilindkirin.
Nirxandina nû ya dosyayên penaberiyê:
Wezîrê Navxweyî amarên girîng ên derbarê rewşa qanûnî ya civaka Sûrî de eşkere kirin, ku rayedarên welat nêzîkî 13000 dosyayên penaberiyê yên Sûriyan ji dema ketina rejîma Esed ve ji nû ve vekirine û vekolane. Di encamê de mafê parastinê yê 4400 kesan hatiye betalkirin an jî kêmkirin. Karner tekez kir ku wezaret dê piştî sê mehan encamên vê bernameyê binirxîne û diyar kir ku tu niyetek ji bo zêdekirina van draviyan nîne heke armanc neyên vegirtin.